O Pleno de Ribeira, reunido en sesión extraordinaria este xoves 9 de febreiro, aprobou por unanimidade iniciar os trámites para municipalizar o aparcadoiro do Centenario, cumprindo así unha demanda histórica defendida polo BNG.
Segundo detallan os informes técnicos e xurídicos a xestión directa por parte do Concello de Ribeira é “máis vantaxosa” e redunda no “beneficio da poboación ribeirense”, avalando as teses defendidas polo BNG. O Concello de Ribeira creará nos vindeiros días unha comisión que estudará as as posibles maneiras de xestionalo que serán expostas aos grupos municipais.
Os concelleiros Luís Pérez Barral e Cruz Rivadulla Márquez mostraron a súa satisfacción asegurando que “o tempo deunos a razón ao se avalar que a xestión pública é máis eficiente”. Neste sentido, aseguran que o Partido Popular errou cando unilateralmente privatizou a xestión porque provocou un encarecemento dos prezos e supuxo prestar un servizo de peor caliadade.
Pérez Barral destacou que o BNG sempre tivo claro que o aparcadoiro debería servir para aumentar as prazas de estacionamento “que tanta falta fan en Ribeira”. O portavoz nacionalista asegura que agora van seguir traballando para rebaixar as tarifas e se apliquen bonificacións as persoas que merquen no comercio local.
Propostas do BNG no Plan Único
A sesión plenaria tamén serviu para aprobar as actuacións que se van realizar grazas ás achegas de 1,4 millóns de euros que concede a Deputación da Coruña mediante o Plan Único.
Os nacionalistas valoran positivamente a inclusión de tres das súas propostas: dotación dunha cuberta no parque das Avesadas para poder usar todo o ano, a mellora da pavimentación, seguridade viaria e accesibilidade na rúa Francisco Lorenzo Mariño en Aguiño e a dotación de vestiarios o campo de fútbol de Oleiros.
